எந்த இரவு?

நிச்சயமாக நாம் (குர் ஆனாகிய) இதனை மகிமை மிக்க இரவில் இறக்கி வைத்தோம்.  மகத்துவமிக்க இரவு என்றால் என்னவென உமக்கு எப்படித் தெரியும்?  மகத்துவமிக்க இரவு ஆயிரம் மாதங்களை விடச் சிறந்தது…

குர் ஆன் 97:1-3

அது எந்த இரவு?

அபூ ஸலமா அறிவித்தார்

.... ரமளான் இருபதாம் நாள் காலையில் நபி(ஸல்) அவர்கள் சொற்பொழிவு செய்ய எழுந்தார்கள். 'யார் நபியுடன் இஃதிகாப் இருந்தார்களோ அவர்கள் திரும்பிச் செல்லட்டும்! லைலத்துல் கத்ரு இரவு பற்றி எனக்குக் காட்டப்பட்டது. நான் மறக்கடிக்கப் பட்டு விட்டேன். நிச்சயமாக அது கடைசிப் பத்து நாள்களில் ஒற்றையான நாளிலுள்ளது. நான் களிமண் மீதும் தண்ணீர் மீதும் ஸஜ்தாச் செய்வது போல் கண்டேன்' என்று இறைத்தூதர்(ஸல்) அவர்கள் கூறினார்கள்…

புகாரி 813

 இஸ்லாமியர்களின் இந்த நம்பிக்கையின்படி, அது இரவுதான் என்பதில் சந்தேகமில்லை.

குர்ஆன் குறிப்பிடும் அந்த இரவு எங்கு நிலவியது?

அது(குர்ஆன்) எங்கு, யாரிடம் எதற்காக இறக்கப்பட்டது என்பதைக் கூறாமல், இறக்கப்பட்டதாக மட்டும் கூறிக் கொள்கிறது. எனவே குர்ஆன் யாருக்கோ, எங்கோ எதற்காகவோ இறக்கப்பட்டிருக்கிறது என்று வைத்துக் கொள்வோம். அப்பொழுது  பூமி இரவுப் பொழுதில் இருந்திருக்கிறது. அந்த இரவையே குர்ஆன் “லைலத்துல் கத்ர்” மகத்துவமிக்க இரவு, ஆயிரம் மாதங்களைவிட சிறந்த இரவு என்றெல்லாம் கூறிக்கொள்கிறது.

குர்ஆன் இறக்கப்பட்ட, குறிப்பிட்ட அந்த இரவில் பூமி மகத்துவத்தால் திளைத்துக் கொண்டிருந்த வேளையில், பூமியின் மற்றொரு பகுதி மகத்துவமில்லாத பகலில் இருந்திருக்கிறது.

குர்அனின் கூற்றுப்படி, இரவிற்கு எந்த சிறப்புமில்லை, குர்ஆன் இறக்கப்பட்டதுதான்  மகத்துவத்திற்குக் காரணமாக அமைகிறது என்பதை கவனத்தில் கொள்ள வேண்டும்.

பூமியின் ஒரு பகுதி இருள் சூழ்ந்து கொள்ளும் பொழுது, அதன் மறு பகுதியில், அதிகாலை, காலை, முற்பகல், நன்பகல், பிற்பகல், மாலை என்று வெவ்வேறு சூழல் இருக்கும். மேலும் பூமிக்கு வெளியில் சென்றால், இரவுமில்லை பகலுமில்லை.

எனவே, நியாயமாகப் பார்த்தால், மகத்துவமிக்க, மகிமை மிக்க ஒரு பகலும் இருந்திருக்க வேண்டுமே?

ஏன் இல்லை?

இரவு-பகல் மாற்றத்திற்கான காரணத்தை குர்ஆன் அறிந்திருக்கவில்லை என்பதுதான் பதில்.

தஜ்ஜால்